Më 9 prill të vitit 2019, 4 persona të maskuar grabitën 4.6 milion euro nga avioni “Austrian Airlines”. Paratë ishin të bankave të nivelit të dytë dhe do të transferoheshin jashtë Shqipërisë. Grabitësit u futën nga hyrja e pasme e aeroportit me një furgon me mbshkrimin “Hetimi Tatimor”. Pasi grabitën paratë, autorët u përleshën me policinë. Nga kjo përleshje mbeti i vrarë Admir Murataj, i cili dyshohej se ishte koka e grupit.
Hetimet për çështjen e “Grabitjes së Rinasit” janë mbyllur. Prokuroria e Posaçme vendosi të kalojë për gjykim dosjen hetimore të një prej grabitjeve më të bujshme në vend. Të pandehur për grabitjen e disa milionë eurove në Rinas janë: Eldi dhe Klement Çala, Oltion Veseli, Renaldo Sula, Elton Pikli, Alkond Bengasi dhe Talo Çela, ky i fundit ende në kërkim. Ndërkohë gjykata ka hequr akuzën për Ragip Hajdinin, i cili humbi jetën disa muaj më parë.