JOQ Albania
App Store
SHKARKO
Home
JOQ Albania

”Ndërtuesi i pallatit të Linda Ramës” gostitet me 560 milionë lekë tender në Durrës
Shkruar nga: M Gjini | Publikuar më: 25/09/2020 21:36

  • Share
  • Share
  • Share
  • Share

Një kompani e cila është përpjekur të mos bjerë shumë në sy, e quajtur “2 T” sh.p.k. rezulton te jetë ndërkohë njëra prej atyre firmave që ka përfituar jo pak tendera nga pushteti. Administrator dhe njëri nga dy pronarët e kompanisë, është Artan Sako. Ky i fundit rezulton të jetë sipas artikujve në media, vëllai i komandantit të gardës së Republikës, Gramos Sako. Por përveçse vëllai i një funksionari të tillë, sipas aludimeve në media, dyshohet se është edhe personi i cili më kompaninë e tij “2T”, ka ndërtuar një pallat në pronësi të vëllait dhe xhaxhait të Linda Ramës.

Ky pallat ndodhet pranë Institutit të Higjenës në Tiranë, dhe aludohet se është ndërtuar në një zonë të destinuar për lulishte. Kompania “2T” sipas të dhënave publike, del se ka përfituar shumë tendera nga shumë institucione shtetërore. Në 6 vitet e fundit, kompania në fjalë ka marrë rreth 15 milionë euro tendera. Por përveç tyre, ajo vazhdon përsëri të përfitojë tendera nga shteti. Në rastin konkret bëhet fjalë për një tender të ri me vlerë rreth 560 milionë lekë të vjetra me TVSH.

Tenderi në fjalë ka për objekt “Rikonstruksion i Rrugës “ Manastiri ” Shënvlash Durrës” dhe mban numrin e referencës REF-67414-07-30-2020. Fondi limit i tenderit është 47,270,484 lekë të reja pa TVSH. Në garë kanë marrë pjesë 5 kompani, dhe fituese është shpallur “2 T” shpk me vlerë të ofruar 46,786,558 lekë të reja pa TVSH (ose rreth 560 milionë lekë të vjetra me TVSH).

Mirëpo në garë ndodhi një paradoks. Njëra nga kompanitë pjesëmarrëse ofroi 31,159,039 lekë të reja pa TVSH (ose rreth 374 milionë lekë të vjetra me TVSH). Kjo do të thotë se kjo kompani në fakt kishte ofruar gati 187 milionë lekë të vjetra me TVSH më pak sesa kompania fituese! E megjithatë ndonëse kriteri i përzgjedhjes ka qenë çmimi më i ulët, për habi kjo kompani që ofroi bindshëm më pak u skualifikua me arsyen tashmë të zakonshme se nuk plotësonte kriteret.

Nga ana tjetër, përveçse u shpall fituese me një ofertë rreth 187 milionë lekë të vjetra më shumë sesa konkurrentët, rezulton se vlera e ofruar nga firma “2 T” është e barabartë me 98,97% e fondit limit. Të dyja këto të dhëna të bëjnë të dyshosh së tepërmi se fituesi ka qenë i paracaktuar. Me pak fjalë, një “gosti” e vërtetë më miliona nga taksat tona.