Ish-ambasadorja kosovare në SHBA, Vlora Çitaku, ka thënë se Forcat e Sigurisë së Kosovës (FSK) janë trashëgimi e Ushtrisë Çlirimtare të Kosovës (UÇK). Çitaku deklaroi kështu nëpërmjet një postimi në ‘Facebook’. Ish-përfaqësuesja e Kosovës në SHBA iu është bashkëngjitur reagimeve kundër presidentes Vjosa Osmani, e cila po akuzohet se nuk e përmendi UÇK’në në një postim dedikuar përvjetorit të Koshares. “Po të mos kishte UÇK nuk do të kishte as FSK”, thuhet në postim.
Lidhur me çështjen e mos-përmendjes së UÇK’së, Osmani vërejtje ka marrë edhe përbrenda partisë me të cilën ishte në koalicion qeverisës.
Ish-kandidatja për deputete, Mimoza Shala, ka kërkuar nga presidentja Vjosa Osmani që ta përmend UÇK’në në postimin në ‘Facebook’ për përvjetorin e Brigadës 138 Agim Ramadani. Analisti Imer Mushkolaj përmes një shkrimi në llogarinë e tij në facebook, ka reaguar ndaj presidentes Vjosa Osmanit.Mushkolaj ka thënë se vetëm Vjosa Osmani mund të shkruajë për betejën e Koshares pa e përmend Ushtrinë Çlirimtare të Kosovës (UÇK).
“Veç Vjosa Osmani mundet me shkru për Kosharen pa e përmend UÇK-në”, ka thënë Mushkolaj në facebook. Reagime lidhur me të njëjtën çështje pati gjatë gjithë ditës. Reagimet erdhën kryesisht nga tabori i PDK-së, ku statuse në facebook shkruan Eliza Hoxhaj e Vlora Çitaku.
Osmani përmes një shkrimi në facebook kujtoi thyerjen e kufirit shqiptaro-shqiptar dhe përmendi Betejën e lavdishme të Koshares. Megjithatë në statusin e saj nuk u përmend fare UÇK-ja.
Ndërsa nga Presidenca, Bekim Kupina ka thënë se Osmani e ka përmendur UÇK-në në fjalimet e saj dhe nuk ka asnjë telashe.