Një ngjarje e rëndë ka ndodhur ditën e djeshme në Roskovec. 25-vjeçari Erdis Rapi pas një konflikti me të atin e tij e ka qëlluar atë me sende të forta dhe ai ka gjetur vdekjen e menjëhershme. Mësohet se e gjithë ngjarja ka ndodhur brenda banesës dhe se konflikti mes tyre ka nisur për motive të dobëta. Ndërkohë të afërmit dhe fqinjtë e tyre shprehen se 52-vjeçari Dhoei Rapi që humbi jetën dhe dy djemtë e tij kishin pasur probleme të shëndetit mendor.
Sipas tyre, ata disa herë kanë marrë edhe mjekime, ndërsa kanë pasur kartela të hapura edhe në Spitalin e Vlorës, ku kanë qenë të shtruar herë pas here për mjekim. Gjendja ekonomike dhe mendore e familjes ishte rënduar edhe më tepër pas vdekjes së kryefamiljares.
Fqinjët shprehen se 25-vjeçari dhe viktima patën fillimisht një debat verbal me njëri-tjetrin, derisa Erdisi e ka qëlluar me shkopin që ruanin bagëtitë. Ata thanë se i ati sapo ishte kthyer nga Kumani, ku do të merrte një rekomandim për ta shtruar të birin, Erdisin, në Spitalin Psikiatrik të Vlorës. Këtë gjë ia ka bërë të ditur edhe të birit, i cili është mërzitur shumë dhe e ka kundërshtuar të atin. Ky i fundit i ka kërkuar të shkojë të ruajë bagëtitë, se këto punë ishin gjëra që i zgjidhte i ati.
Por në këtë moment, Erdisi e ka kundërshtuar, duke i thënë që nuk kishte ndërmend t’i bindej pas vendimit që i ati kishte marrë për ta shtruar në spital. Ata janë konfliktuar fizikisht me njëritjetrin. Djali e ka qëlluar fillimisht me grusht, por më pas e ka rrahur me shkopin e bagëtive, duke e lënë të vdekur në vend. Kanë qenë fqinjët ata që kanë shkuar të qetësojnë situatën e krijuar mes atë e bir, por ka qenë tepër vonë pasi e kanë gjetur trupin e 52-vjeçarit të shtrirë përtokë dhe të mbytur në gjak.
