Një çudi e vërtetë është kjo që do t’ju paraqesim në vijim. Drejtoria e Përgjithshme e Arkivave të Shtetit rezulton se paska nevojë për të marrë automjete me qira. Nuk dihet saktësisht se për çfarë mund t’i duhen automjetet arkivave, por një fakt mjaft i dyshimtë del në pah.
Institucioni në fjalë kërkon të blejë 4 automjete të cilat duhet të jenë patjetër prodhim i vitit 2019/2020 dhe për më tepër me zero kilometra. Për këtë ata janë gati të shpenzojnë plot 100 milionë lekë të vjetra dhe kanë hapur një tender me referencë REF-85467-02-01-2021 dhe me objekt “Marrje automjetesh me qira operacionale (Leasing) për 4 automjete”.
Shikohet se këto automjete do të përdoren vetëm për 4 vjet dhe më pas do t’i rikthehen firmës që do të fitojë tenderin. Ky në fakt është një detaj mjaft i dyshimtë pasi me kaq shumë para sa janë vënë në dispozicion, këto 4 automjete mund të ishin blerë dhe pas 4 viteve do të qëndronin përsëri në pronësi të institucionit. Të shpenzosh rreth 100 milionë vetëm për qira, duket si një procedurë e dyshimtë në mënyrë që dikush të ketë përfitime në kurriz të shtetit. Mbetet për t’u parë se cili do të jetë fituesi.