Me afrimin e zgjedhjeve, duket s enjë dorë të mirë me lëkë po e bëjnë edhe pjesëtarët e KQZ, Komisionit Qëndror të Zgjedhjeve. Kryetari i tij, Ilirjan Celibashi ka organizuar një tender me numër reference REF-84302-01-19-2021 që ka si objekt “Blerje vula (kode) sigurie”. Shikohet se procedura është e tipit “me negocim, pa njoftim” dhe ka për fond limit vlerën prej 17,472,500 lekësh të reja pa TVSH.
Këto vula me kod sigurie parashikohet që do të përdoren për mbylljen e kutive të votimit me fletët e votimit dhe kutive të materialeve të votimit në zgjedhjet për Kuvendin të datës 25 Prill 2021. Shikohet se në tender kanë marrë pjesë dy firma, ku të dyja kanë ofruar thuajse vlera identike. Kjo përbën një fakt mjaft të dyshimtë, pasi në praktikat ndërkombëtare të tenderimit klasifikohet si rasti kur kemi fitues të paracaktuar.
Më konkretisht fituese është shpallur një firmë “fantazëm” me kapital prej vetëm 1.450.000 lekësh të reja. Por nga ana tjetër kjo firmë, ka arritur të fitojë një vlerë rreth 12-fish më të lartë, jashtë çdo norme logjike. Kështu, fituese është shpallur kompania “AGIMI B” me një vlerë prej 17,372,485 lekësh të reja pa TVSH. Shikohet gjithashtu se diferenca e vlerës fituese me fondin limit është thuajse identike, përkatësisht sa 99.42% e tij.