Lorenc Tosku është aktualisht kryetari i Bashkisë Peqin. Duke qenë në këtë pozicion, me sa duket nuk e ka humbur rastin që të organizojë tendera të dyshimtë. Njëri prej tyre është ai me numër reference REF-82330-12-16-2020 që ka për objekt “Rikonstruksion sektori i depove Peqin”.
Tenderi në fjalë shikohet se ka një fond limit prej 58,024,050 lekësh të reja. Duke hulumtuar mbi dokumentacionin e procedurës së prokurimit shikohet se në garë ka marrë pjesë vetëm një bashkim kompanish, përkatësisht “Boshnjaku B” në pronësi të Bashkim Dulla & “Pesë Vëllezërit” në pronësi të Shkëlqim Dulla.
Këto firma, pronarët e të cilave rezultojnë me të njëjtin mbiemër, kanë ofruar vlerën prej 57,966,770 lekë të reja pa TVSH, ose rreth 700 milionë lekë të vjetra me TVSH. Vihet re se vlera e ofruar ka një diferencë qesharake me fondin limit, përkatësisht është sa 99.9% e tij. Ky raport ngre dyshime tepër të forta se tenderi është i manipuluar dhe se fituesit janë të paracaktuar. Këtë e përforcon edhe fakti se në garë nuk ka marrë pjesë asnjë kompani tjetër, pra nuk ka patur fare konkurrencë.