Ditën e shtunë rreth orës 9 të mëngjesit, një vrasje me armë ka tronditur Himarrën. Kliti Leka, 53 vjeç, ka pranuar autorësinë e vrasjes me armë zjarri të biznesmenit Niko Goro. Pas arrestimit, ai ka deklaruar në polici se shkak i konfliktit që ka agravuar deri në vrasjen e 51-vjeçarit, ka qenë një borxh i pashlyer që shkon deri në 70 mijë euro. Ai ka thënë para policisë se Goro ka ndërtuar në një truall që ai pretendon se e ka patur të trashëguar dhe nuk i ka dhënë paratë që i ka kërkuar dhe se viktima nuk e ka pranuar fare borxhin. Po ashtu, në dëshmi thuhet se Leka është shprehur se nuk ka patur si qëllim ta vrasë, por vetëm ta trembë. Grupi hetimor nën drejtimin e Prokurorisë po punon për sqarimin e rrethanave të ngjarjes dhe përcaktimin se me cilën prej armëve të sekuestruara, autori ka kryer krimin.
