Skandal, a çudira shqiptare. Quajeni si të doni. Në të dyja rastet ka vlerë dhe kuptim. Është me të vërtetë e paimagjinueshme se si populli mund të vidhet kaq hapur nga politikanët. Të gjithë banorët e Tiranës dhe jo vetëm, të cilëve u ka rënë rasti të kalojnë në Bulevardin “Zogu i Parë” në dy muajt e fundit, u ka zënë syri me tmerr se si fasada e Ministrisë së Drejtësisë u prish nga Erion Veliaj për shkak të rregullimit të këtij bulevardi.
Ndonëse bëhej fjalë për heqjen e pllakave të bulevardit dhe zëvendësimin e tyre me asfalt, në mënyrë mjaft të çuditshme firma që po bën punimet, prishi edhe fasadën e kësaj ministrie. Të gjithë ata që kanë kaluar në atë zonë te Tiranës e mbajnë mend mjaft mirë që fasada jo vetëm nuk kishte probleme, por përkundrazi qëndronte mjaft mirë edhe estetikisht duke patur parasyh që është rikonstruktuar vetëm pak vite më parë.
Por me sa duket plani ka qenë i mirëmenduar. E kanë prishur vetë në mënyrë që pak kohë më vonë të bëjnë një tender të ri për ta rindërtuar. Kuptohet se në këtë rast një llokmë e mirë e parave do të përfundojnë në xhepat e organizatorëve. Dhe në fakt, tenderi nuk ka vonuar. Organizator është vetë Ministria e Drejtësisë e cila ka hapur procedurën e prokurimit me numër reference REF-63362-06-30-2020. Objekti i tenderit është “Rehabilitimin emergjent i godinës së Ministrisë së Drejtësisë” me fond limit 21.325.600 lekë të reja pa TVSH.
Rezulton se në këtë tender kanë marrë pjesë plot 31 kompani. Ky është një numër mjaft i lartë pjesëmarrësish që mjaft rrallë ose thuajse kurrë nuk vërehet në asnjë procedurë tenderi. Ndoshta për shkak se luhet lek i madh dhe se përfitimet që do të merren janë jo të vogla. Tenderin në fakt rezulton se e ka fituar kompania “INA” shpk me vlerë të ofruar 12.861.691 lekë të reja pa TVSH ose rreth 154 milionë lekë të vjetra me TVSH. Kjo kompani ka si administrator dhe ortak të vetëm shtetasin Ferdinand Çaushi.
Por nëse bëjmë një analizë të ofertave të kompanive të tjera, shikojmë se një nga pjesëmarrësit ka ofruar vlerën 11.323.310,40 lekë të reja pa TVSH, ose rreth 18 milionë lekë të vjetra më pak me TVSH. E megjithatë kjo firmë për habi është skualifikuar. Arsyeja e skualifikimit është mjaft e çuditshme, pasi ndonëse komisioni i vlerësimit konstaton se firma i plotëson të gjitha kriteret, ajo refuzohet pasi është “anomalish e ulët” dhe jo bindëse.