Jo gjithmonë duhet patur mendja vetëm tek puna, pasi edhe argëtimi ka pjesën e tij të rëndësisë. Sepse pasi lodhen gjithë ditën duke vjedhur paratë e popullit apo duke bërë “lojëra” me tenderat, zyrtarët e lartë të administratës shtetërore duhet të kenë edhe qetësinë e nevojshme që të bëjnë “punën” të nesërmen akoma edhe më mirë. Me pak fjalë që të mbushin xhepat.
Në rastin konkret rezulton se Benet Beci, drejtori i Korporatës Elektroenergjitike Shqiptare, i “ka rënë më top” milionave që ka në dispozicion. Bëhet fjalë për plot 170 milionë lekë të vjetra me TVSH që në fakt duket se do të shndërrohen në “rrush e kumbulla”. Kështu, nëpërmjet një procedure të hapur – marrëveshje kuadër, me mjete elektronike, me numër reference REF-71832-09-15-2020, KESH Sh.a. ka organizuar tenderin me objekt “"Shërbime në funksion të rritjes së imazhit dhe organizimi i eventeve të KESH sh.a.".
Por çfarë janë këto shërbime në funksion të rritjes së imazhit? Asgjë më tepër sesa axhenda, blloqe, zarfa, broshura, kartolina, lapsa, stilolapsa, çadra, jelëkë, usb, çanta, kapele e madje edhe logim automjetesh. Përveç kësaj në shifrën e fryrë prej 170 milionë lekë të vjetra, përfshihen edhe sallat me qira, tenda, mikrofona, bokse, karrige, kolltuqe, deri tek fotografi dhe kameramani.
Pra shikoni se si veç karrigeve, Benet Beci ka nevojë edhe për kolltuqe ku të vendosë me rehatllik të pasmet për festat që do të organizojë për imazhin e KESH. Ndërsa fotografi dhe kameramani me sa duket shërbejnë që të nxjerrin Benetin sa më bukur në fotografi gjatë këtyre eventeve. E në fakt, meqë jemi këtu, nuk kuptohet se përse duhet edhe fotograf, edhe kameraman. A nuk mund t’i bëjë të dyja i njëjti person? Apo leku letër thuaj. Hajde gëzuar o Benet, mirë e mbarë në festat e KESH-it!
