Një tjetër person i shpallur në kërkim ndërkombëtar nga policia italiane është arrestuar në Durrës.
Bëhet fjalë për shtetasin F. T., 49 vjeç, i cili ishte shpallur në kërkim për trafikim të lëndëve narkotike.
49-vjeçari ndodhet në arrest provizor në Shqipëri pasi pritet ekstradimi i tij drejt Italisë ku edhe do gjykohet dhe do marrë dënimin lidhur me akuzën për “Trafikim të narkotikëve”.
Shtetasi F.T me banim në Gjepalaj, Shijak, Durrës ishte shpallur në kërkim nga Interpol Roma dhe ndaj tij Gjykata e Pavias, në Itali kishte lëshuar një urdhër-arresti ndërkombëtar.
Njoftimi:
Grupi Hetimor i Narkotikëve, në bashkëpunim me Komisariatin e Policisë Durrës, si rezultat i shkëmbimit të informacionit me Departamentin e Policisë Kriminale dhe Interpol Tiranën, bënë të mundur lokalizimin, kapjen dhe arrestimin provizor, me qëllim esktradimin drejt Italisë, të shtetasit F. T., 49 vjeç, banues në Gjepalaj, Shijak, Durrës. Ky shtetas ishte shpallur në kërkim ndërkombëtar nga Interpol Roma, Itali, në bazë të urdhër-arrestit ndërkombëtar të lëshuar nga Gjykata e Pavias, Itali, për veprën penale “Trafikimi i narkotikëve”. Arrestimi provizor u krye me qëllim ekstradimin e tij drejt Italisë, mbështetur në “Konventën Evropiane të Ekstradimit” dhe marrëveshjen dypaleshe mbi ekstradimet, nënshkruar mes Republikes së Shqipërisë dhe Italisë.