Policia italiane ka shkatërruar një bandë shqiptarësh, e cila akuzohet për kryerjen e një sërë grabitjesh në veri të Italisë.
Mediat italiane raportojnë se gjatë aksionit janë sekuestruar makina luksi, armë, me qindra mijë euro, të cilat janë përfituar nga grabitja e banesave në Milano.
Aksioni policor nisi në orët e para të mëngjesit të 29 majit dhe u shtri në provincën e Milanos, Monza dhe Brianza.
Raportohet se në prangat e policisë kanë përfunduar 10 persona, të gjithë me origjinë shqiptare.
Po ashtu, bëhet me dije se pesë persona të tjerë po hetohen në gjendje të lirë.
Sipas hetimeve të kryera nga policia italiane, rezulton se paratë e vjedhura investoheshin në sektorin turistik në Shqipëri.
Mësohet se karabinierët kanë sekuestruar 250 mijë euro cash, 7.5 kilogram ar, orë të shtrenjta dhe sende të çmuara (259 prej orëve dhe bizhuterive ishin nga marka shumë të shtrenjta).
Gjithashtu janë sekuestruar edhe dy makina luksoze Audi Rs3 dhe Rs4, me targa të klonuara, dy pushkë, 4 pistolete, mjete që përdoreshin për grabitjen dhe zbulues metalesh.
Burimi: Fivedabliu.it|Përktheu dhe Përshtati: JOQ Albania
