Kompania e ruajtjes së sigurisë fizike “ EuroGjici- Security” Shpk, ka fituar dy tendera në institucionet publike si Biblioteka Kombëtare dhe në Qendrën Spitalore Universitare “ Nënë Tereza”.
Kjo kompani deri në vitin 2014, kishte si pronar Safet Gjicin, i cili aktualisht mban postin e Kryetarit të Bashkisë Kukës. Ndërsa tani kompania drejtohet nga Lavdrim Gjici i cili është i afërmi i kryetarit të bashkisë së Kukësit.
Tenderi i dhënë nga Biblioteka Kombëtare kap shifrën e 38 milion lekëve dhe është për një afat janar-shtator 2020 (9 muaj). Kjo kontrata është lidhur midis dy palëve në fund të dhjetorit.
Ndërsa në tenderin tjetër të dhënë nga QSUT, i cili kap shifrën e 370 milionë lekëve, kompania e Lavdrim Gjicit nuk e ka fituar e vetme tenderin, pasi si aleat ka pasur edhe kompaninë “Ndreu Security Service” dhe “Toni Security”.
Në kompaninë “ Ndreu Security” njëri prej ortakëve është Pavlin Ndreu, i cili është vëllai i kryetarit të Bashkisë së Lezhës, Pjerin Ndreu. Kontrata është lidhur me 10 maj 2019, por është bërë publike në buletinin e 20 janarit 2020 nga Agjencia e Prokurimit Publik.